உன் சின்ன விழியில்...

மலங்க மலங்க முழிக்கும்
உன் சின்ன விழியில்
என் விழி தெரியுதடி.....


தெருவில் அக்கா கைப்பிடித்து நடக்கும் போது
என்னை புறாவாக்கி, கடிதத்தை கையில் திணித்து
அத்தான் முன் என்னை தள்ளிய போதும்......


பள்ளிவிட்டு வரும் வழியில் குடித்த சுக்குக்காபிக்காக
வீட்டுவாசலில் காசு கேட்டு
கடைப்பையன் வந்து நின்ற போதும்...


தமிழ் வகுப்பில் கடைசி பெஞ்சில் உட்கார்ந்து
சினிமா பாட்டுபாடி
டீச்சர் வாசலில் நிறுத்திய போதும்...


இறுக தலை வார காத்திருக்கும் அம்மா முன்
தலை நனைத்து
ஈரம் சொட்ட சொட்ட நின்ற போதும்...


அறை முழுவதும் காய வைத்திருக்கும் நெல்லை ஒதுக்கி,
மூலையில் கதை புத்தகத்துடன் ஒதுங்கி
சித்தியிடம் பிடிபட்ட போதும்....


காலேஜ் கட் அடித்து ஊர் சுற்றி
மினி டிராப்டரை தொலைத்துவிட்டு
அப்பா முன் நின்ற போதும்...


சேலையை யாரோ உடுத்தி கொடுக்க
மணமேடையில் தடுக்கி ஏறும் போதும்...


இப்படிதானே கண்ணே நானும் முழித்திருந்தேன்...


என் விழியின் கதைதானே கண்ணே
நாளை உன் விழியில்....